任叫任食日式放題 - 品村日本料理

呢個報告得來不易，其實已經係6月既事，打過幾次然後部電腦hang幾次，成日唔記得save次次都搞到乜都冇哂，搞到都冇心機打報告，不過最後終於都打完。

某日好得閑又同朋友上大陸玩，有人又想食自助餐/任叫任食類型既。當時有人提出四個選擇:大漁，四海一傢，大飽口福，品川。

大漁同四海一傢成日都鬼咁多人，冇興趣。本來想試大飽口福，但係好遠，唔多識去，唯有等下次搜集好資料後再去。咁凈返品川唯有去睇下點先啦。

本來品川果度係有西式同日式兩種，我地諗住試哂兩邊啦，點知話西式果邊比人包左場，隻係凈返日式。其我同一啲朋友都唔食生野，所以有人提議去另一度，不過見個菜單都幾多野食，所以最後都係食品川，地址係萬象城對面。

因為我地好早就去左,去既時候都唔多人，一坐底即刻係咁叫先，不過唔係樣都任叫任食，有啲隻係限每人一份。

燒銀鱈魚– 好好食，條魚燒得幾香，肉又夠滑。

鵝肝多士– 我就覺得普通啫，但有朋友話好好食

鐵板燒牛柳粒– 超好食，香口得黎好有肉味，又多肉汁，但又一啲都唔韌。最後我叫左叁碟~

醬燒魷魚筒– 都唔錯既，不過覺得個醬濃左啲。

雞軟骨– 我唔食既，所以唔知好唔好食。

鳥冬– 好淡，可以話係完全冇味既。

芝土焗大蝦– 雖然隻蝦一啲都唔大，但係超好食，啲芝士夠香濃，但又冇遮到蝦既味。

芝土焗帆立貝– 比大蝦差一啲，帆立貝冇乜味。

日式燒雞扒– 炭黎架!?食左一啖即刻唔食…好難食…

牛肉涮涮鍋– 啲牛肉普普通通啦，冇乜特別。

日式煎漢堡扒– 又係煎得太耐，不過都好過雞扒既…

蒜容蒸扇貝– 點解有啲咁中式既?不過味道唔差既。

煎玉子– 其中一個朋友鐘意食既玉子，不過我就覺得冇乜蛋味囉。

茶壺湯– 海鮮湯黎，入面有料既，不過冇影到，亦比較清淡冇乜味。

其實仲叫左好多好多，不過好多都冇影相或者係我唔食既(刺身，生蠔等)。

總括黎講，呢度啲野食都算幾啱我食，雖然就一定唔算平架喇。有機會既話我會再去食，不過下一次一定要一次過試埋西式!(不過就要比多啲錢喇)

味道........4/5 除少部分外都啱我口味

環境........4/5 環境格局唔錯，係喑左啲

衛生........4/5 乾凈企理

價錢........3.5/5 雖然要百幾蚊，不過日式放題算係咁啦

服務........4/5 態度唔錯，執埋幾快手下